A·dokni Education Minister Rakkam Sangma, mijal salo Meghalaya ni damgittam biaprango Common University Entrance Test (CUET) porikkako sechakna ge·gittam centre rangko ru·utgija somoirangni gisepon songe on·anggen ine ku·watangaha. Sangma kobor ra·timgiparangna parakatanio, National Testing Agency (NTA) ni Director General baksa golpoaton, ua Meghalaya a·dokna CUET centre rangko Shillong-o ge·gni aro Tura o ge·sako songe on·gen ine aganataniko Sangma u·iatangaha. Indake ong·genchimoba porikkako senasienggipa chatro chatrirangni biming segatako nigrike uamang bang·bata centrerangko songe on·angkunaba parakataha.
Ia kattarangko Sangma, CUET porikkako sena am·enggipa chatro chatrirangni neng·nikaniko niatna maming ja·kurangko de·jaenga ine VPP dolni matnangani ja·mano aganangaha. Sangma iani bidingo talatna, VPP dolrangkoba re·bae unbaksa golpochina okamatanikoba dakangaha. Ian sorkarini dakna nanggni kam ong·a aro Education department chatro chatrirangni neng·nikaniko niatna raken krenge kamko ka·angenga ine Sangma agandapangaha.
Unbaksana dingtangmancha Meghalaya o chatro chatrirangni CUET aro gipin porikkarango name dakna man·gijani bidingoba suk ong·gijaniko Sangma parakangaha. Indakgipa porikkarangko senasiengon, chatro chatrirangko ua name poraie aro tarisamsoe sechina mol·molangaha. Maming tarisamsoanirang dongjaesa porikkao chu·sokna man·jaenga, tarisamsoani donggenchimode Meghalaya a·doko ia porikkako see chu·sokna bil amgiparang bang·bea ine Sangma aganangaha. Unbaksana NEHU ni VC ni agananiko janapangengon, CUET gadango porikkako sena sokdojae bang·bea biaprangon bangbang ong·e dongenga ineba Sangma janapangaha.
