Re∙baenggipa Lok Sabha Election-o Congress ni dilgipa Saleng Sangma ni Tura constituency o susana am∙anio Education Minister Rakkam Sangma una nambegipa skaniko on∙ani gisepon electionko chenagita a∙bri chubegipako maldoagita chacha jotton ka∙na nangskagen ine aganangaha.
Saleng Sangma ni election susaanio changsaba sirikgijani gimin Agatha Sangma na maiba neng∙nikaniko ra∙bana amgenma ine sing∙anina, ia 2024 bilsini MP election-o Saleng skanggipa changna sirikna nanggen ine Rakkam Sangma aganchakatskaaha.
Meghalaya a∙dok NPP party ni Conrad Sangma ko Chief Minister na seokako man∙e ma∙mong sorkarini bang∙a scheme rangko ra∙bana man∙anian a∙dokna bilonggen dakchakaniko on∙enga ine Sangma aganangaha. Unbaksana re∙anggipa somoirango a∙songni Prime Minister aro Home Minister rangko grongna namen neng∙nikaniko chagrongengchimoba, da∙o Conrad Sangmani dilanichi uamang nanggipa kamrangnaba maming neng∙nika grian grongnagita man∙engaha ine Sangma agandapangaha.
