Mijal salni bako Shillong Times koboro saksa MDC Aktar Ali ni tangka paisarangko jakkalsretgipao AHAM dolni Co-Chairman Brejio Marak ni bimungchi koboro parakatanina, AHAM CEB H.Q Tura ni President Georgeprince Ch. Momin kakket ong·ja ine aganan baksana raken jegalaniko dakataha. Momin ni agananigitade uamangni doloniko see rakkigiminrangoniko nipilange nion, Brejio Marak minggipa bimingo darang mandekoba AHAM dolo nikjaha aro uni gadangko Co-Chairman ine koboro gataniara kakket ong·ja ine parakataha. Iani bidingo AHAM dolrang Brejio Marak ko badia biaponi ong·a uko ma·sija aro ua AHAM dol baksa maming dakeba bak dongja ine aganatskaaha.
Unbaksana ia kakket ong·gijagipa koborko parakatanio, AHAM doloni maming dakeba jak on·paani, dakchakani aro on·gilanirang dongja ine Momin aganangaha. Ia kobor ara kakketgipa ong·ja aro manderangko dilsretani ong·a ineba ua janapataha.
AHAM dol pangnan nambate, kakket ong·e, u·i ma·siate, bimchipe kamrangko ka·angenggipa ong·a ine Momin talatangaha. Ia dilsretgipa koborni bidingo dolko namgijagipa bimungona ra·baani gimin am·sandianiko dake kraa ja·kurangko de·anggen ine Momin parakataha. Mikkangchi indake kakketgijagipa koborrangko parakatna skang ja·pang ja·dilko talchenge kamrangko ka·china aro ia obostani bidingo adita u·ina nangdapanirangko nanggenchimode talatnagita tarisamsochinaba AHAM dolrang didiangaha.
