Mijal salni bako Meghalaya Cricket Association-ni kal·chakram-o bilsi 23 ni ning·o ong·gipa me·asa dolrangni Col. CK Nayudu Trophy na cricket kal·anio, Meghalaya dolrang 180 runrangchi brigipa aro bon·kamgipa salni kal·anio Arunachal Pradesh dolrangni kosako chenagita man·aha.
Meghalaya dolrang skanggipa salo 203 runrangko dokanggenchimoba, Arunachal Pradesh dolrang 224 ona sokdoange run 21 chi skangsoe sokachakgipa dolna neng·nikaniko ra·baaha. Swastic Chettri 190 runko wicket ga·akatgija bon·kamaona dokanichi Meghalaya dolrangna 368 runko gnigipa innings o tarina dakchake Arunachal Pradesh na 340 nisan ko tarina man·aha. Abhishek Kumar ni nambee robolko go·anichi ua chu·gimik 98 runrangko on·e sak 11 wicket-rangko ra·angaha.
Meghalaya dolrang changbri kal·anirangon nambee kal·e semi-final ona sokdoangaha. Da·o uamang changgipin kal·aniko February 4 tariko Nagaland baksa kal·angskagen.
