Re·baenggipa International Water Conclave 2024 ko nichaksoengon, Executive Engineer, Water Resources, South West Garo Hills office nigita, a·jani gadango noksa salsusaaniko da·al salni bako Springfield Higher Secondary School, Ampati o ong·atangaha. Ia noksa salsusaaniko “Water Conservation” katta bichongo panchake ong·atanio, dingtang dingtang skul rangni chatro chatrirang aro songdongenggipa sak 34 manderangni bak ra·anganiko nikangnagita man·angaha.
Katta bichongko done noksa salsusaataniara, mikkangchi a·bri jolo songdongenggipa manderangna maming jajrengani gri chirangko ripingani aro tange rakkina man·agita kamko ka·ani bidingo pangchake susagiparangko noksarangko salchina ge·etangaha. Ia susaanio chegiparangni noksa salgiparangko Shillongona watate donsogimin judge rang name nianiko dake sakgittam seokako man·giparang a·dokni gadango susaangnagita cholko man·angskagen.
Unbaksana knal salni bako a·jani dingtang dingtang biaprangko aro chiring chibisikrangko rongtal an·talataniko dakangagen ine u·iatangaha. Una agreba Sonibar salo, Nature & Nurture Quiz Competitionko Springfield Higher Secondary School o ong·atanggen ineba u·iatangaha.
A·jarango indakgipa awareness programme rangko ong·atan baksana bakrime kamrangko ka·e, chirangko ripinge rakkina chu·sokanichi, mikkangchi International Water Conclave ona sokatna dilaniba ong·anggen.
