A·dok sorkari mijal salni bako ge·gittam Autonomous District Council (ADC) rangko mikkang antini gisepo 15 Finance Commission ni ning·o Utilisation Certificate (UC) ko on·chinagita ge·etaniko dakangaha. 15 Finance Commission ni ning·o ge·gittam ADC rangni UC rangko da·onaba on·kugija ru·ute donenganina uamangna somoirangko ra·doe on·anio pangchake nipiltaianiko dake Deputy Chief Minister mikkang antini gisepo on·chinagita ge·etangaha ine koborna parakataha.
Uamangni UC rangko on·ani ja·manosa ADC rangna gnigipa instalment na chamatgipa tangka paisarangko man·agita ma·mong sorkarina watate sengna nanggen ine Tynsong u·iatangaha. Unbaksana district council rangna sokatna nanggipa tangka paisarangara 500 crore mangnigita ong·a ineba Tynsong agandapangaha. Iarangni bidingo sing·anina, ma·mong sorkarinigita gitalgipa portalrangko a·bachengatani a·selo adita ru·utanirangko chagrongenga ineba aganangaha.
Sorkarini gital ra·gatgipa a·damo upload ka·nagita neng·nikanirangko mongsongbate songadamrango chahrongani a·sel C&RD, district council, DCA department aro dingtang dingtang department rang name bakrime kamko ka·esa chu·soknagita man·anggen ine Tynsong aganangaha.
