Re·anggipa February jani 3 tariko, Gasuapara AHAM unit aro Women’s Wing bakrimenba South Garo Hills Gasuapara ni ning·o minggitam nangchongmotgipa kamrangni bidingo janapate Chief Minister Conrad Sangma-na chittiko pakwatangaha.
AHAM dolrang skanggipao SGH Gasuapara songo sanchakram nok chong·motan Hospitalko rike on·china aganangaha. Sanna bannaniko ra·na neng·nikanirangko chagrongengani gimin aro manderang bang·roroengani a·selo Sub-Centre-o sanchakna chakjaenganiko nike uamang Hospitalko tarakale rikpachina mol·molataha.
Gnigipao uamang Gasuapara block ni ning·o songdongenggiparang bang·batroroengani gimin gital Civil Sub-Division-ko ra·bae on·china mol·molangaha. SGH a·ja gimiko Sub-Division ge·sasan dongaiani gimin gital Sub-Division ko songe on·genchimode bang·a nanganirangko chu·sokatna manderangna dakchakani ong·gen aro bang·bea songrangna jekai Rugara, Dimapara, Gasuapara, Dumnikura, Ramchengga, Kapasipara, Sibbari ni manderangna jakkaltobegipa ong·gen ine chittio janapataha. Iasan ong·aigija kamrangko nambate ka·na aro departmentrang songni manderang baksa sepangbate ma·sigrike kam ka·na man·agita ia gital Civil Sub-Divisionko nangenga ine uamang aganangaha.
Bon·kamao uamang Gasuapara songni sima ari jolo anti cha·chakna noktoprangko rike on·china chittio mol·molataha. Ia sima ari jolo gital anti cha·chakna tarianiko uamangni ma·sianigitade Border Development Director ni a·sel ja·man chakaniko man·aba gnang ine uamang u·iatangaha. Ia antidamko tarie on·genchimode songni manderangna kamrangko bikote on·an baksa pale sim·e cha·anio aro bading chiwalaniko tang·toatgen ine AHAM dolrang aganangaha.