Re·anggipa January jao ong·atanggipa chang 5 gipa Meghalaya Games aro Khelo India 2023-o bakko ra·e chu·sokgiparangna U Soso Tham Auditorium Shillongo mande ra·pilaniko Chief Minister Conrad Sangma da·al salo dakangaha. Ia programo a·dokni Health Minister Ampareen Lyngdoh, Sports Minister Shakliar Warjri aro gipin officialrang dongpae bakko ra·angaha.
Chief Minister bang·a chu·sokgiparangna katchapaaniko on·an baksana uamangni chu·soke a·dokna mikkim rasongko ra·baaniko manina nangchongmota ine aganangaha. Ia antiko dingtang mancha chadamberangna minge dingtang dingtang a·barang jekai doka damani, kal·ani, badingani aro gipin a·barangko man·chape manianiko dakanggen ine Sangma parakangaha. Ian uamangni gamchatbegipa aro namgipa daitoko ra·e kal·aniko mesoka jean medal cheani mangmangsan ong·aigija gipinrangna namgipa dakmesokaniko on·a ine Sangma agandapangaha.
Ia somoio Sangma, Meghalaya Games o bang·a neng·nikanirang donggenchimoba kam ka·e chu·sokatanina Sports department, MSOA aro bak donge kam ka·giparangko mittelangaha. Unbaksana Sangma a·dokni football kal·gipa chadamberangko Khelo India 2023 o kal·e cheanina katchapaaniko on·angaha. Programo aganengon Sport Minister, Shakliar Warjri, dingtang dingtang kal·giparangna adita tangka paisa on·giparangko an·tangtangko namdapatna jakkalchina didianganikoba on·angaha.
