South West Garo Hills, Mangsang Gittim Jaluagre songo sakgittam ra·sruke cha·gipa denggu dakgiparangko songni manderang rim·rikenba uamangko doke saknaataha ine koborna parakataha. Ia ong·a obostako February 4 tarikni attam 8 bajimango pulisrang kobor man·e Garobadha OGC aro uni ka·rimskarang a·damona re·ange ramasamo gale donenggipa saknaa man·gipa sakgittam manderangko naljokataha ine u·iatangaha.
Jokom ong·a man·gipa manderangko bikan Garobadha PHC ona ra·ange sannaniko dakengon rim·a man·gipa Skagre songoni Balen G. Sangma (30), Lt. Gurin Ch. Marak-ni depante aro Sken D. Shira (30), Jison B. Marak-ni depante saknaako ra·chakna man·jae CHC-on janggi galangaha. Sakgipin rim·a man·gipa Arenggre songoni Betuwel D. Shira (22), Porindro Sangmani depanteko nambata sanna bannaniko dakna Tura Civil Hospitalona watataha. Batanggimin salrangoba iamangoni sakgni bang·a namgijagipa kamrang jekai so·ota, rim·sruka, dabia, silchi darerangko jakkalani bidingo rim·a man·giparang ong·a ine koborna parakataha.
Obosta ong·gipa a·damoniko pulis dolrang Maruti 800 AS157176 gari baksa mobile phone, Kukri, kori be·gimin, United Garo People Forum (UGPF) South West Zone Ampati HQ Chairman-ni seal, an·chi nanggimin boltong aro wa·a, ID card rang, tangka gong 1700, unbaksana UGPF SWGH office-ni manderangko see rakkigimin ki·tapko man·aha.
Ia mamlani bidingo Ampati pulis thanao, number 13(02)2024, 302/307/326/342/427/34 IPC ni ning·ao mokordoma ka·angaha aro manderangko niam retiko an·tangtang jako ra·gija saoba ia dakgipa kamrangko ma·sigenchimode uamangna kobor on·china pulis dolrang didiata.
