Shillong-o me·asarangna ong·atenggipa bilsi 23 ni ning·o ong·giparangni Col CK Nayudu Trophy na cricket kal·anio Meghalaya dolrang chang 5 joljol cheange mijal salo Nagaland dolrangko 134 runchi MCA kal·chakramo amataha.
Skanggipa innings o balwarang rakbeani a·selo kal·na namgipa sal ong·jaoba Meghalaya dolrang chu·gimik 295 runrangko wicket bon·e ga·akate man·aha jeon Nagaland dolrang 74 mangmangkosan doke, Meghalaya dolna 221 runchi skangsoe dongna cholko on·aha.
Gnigipa innings o Meghalaya dolrang 31.5 gipa over-o sak 10 wicket ga·ake 106 runkosan man·aha. Uamangoni skanggipa century dokgipa Nishanta Chakraborty gnigipa innings-oba 57 ko bon·aonan wicket ga·akatgija dokange Nagaland-na 328 runko chena nisan donangaha.
Nagaland dolrang 328 nisanko chena rikengon kal·anio name dakpilna jotton ka·beoba 193 run-onasan sokdona man·e Meghalaya-ni jako sirikna nangaha. Uamangoni dokgiparangoni Afzal 58 aro Sujal Prasad 32 runrangko man·angaha.
Meghalaya dolni robol gogiparangoni Manish Sharma 10.5 over-o 22 runkosan on·e wicket 4 ko ra·aha. PM Santhosh sak 5 wicketko skanggipa innings-o man·e, gnigipa innings-o sak 3 Nagaland-ni a·bachengao dokgiparangko ra·anichi kal·a gimiko 76 runko on·e sak 8 wicket-ko ra·na man·aha. Badonnam Mylliemngap aro Bipin Kumar Ray, iamang sakgniba wicket prak ra·e on·angpaaha.
Kal·anio chang 5 joljol chee Meghalaya dolrang round robin stage-ko matchotaha jeon 31 point rangko man·e skanggipa ong·e dongenga aro semi-final ko February 11 o Shillongo kal·anggen. Nagaland dolrangna ian skanggipa ama cha·chenggipa ong·aha jeon uamangba 25 point-ko man·e gnigipa gadango ong·skaenga.
