Ia jani re·baenggipa salrangni gisepo adita bijoli sringgipa line rangko aro substation rangko bijoli watanio nambatatnagita tariani a·selo dingtang dingtang biaprango bijoli den·anirangko dakangnagita, Tura MePTCL Transmission & Transformation ni Executive Engineer da·al salo u·iatangaha. Chong·motan February 10, 17, 24 tarikrango, Loc 94, Loc 130 jolo signature analysis, be·gimin disc aro jumper ko taridapnagita 132KV Nongalbibra-Rongkhon line ko pringni 8:00 bajioni 11:00 bajiona bijoli den·aniko dakanggen jeon West Garo Hills aro South West Garo Hills jolrango janapgimin tarikrango u·iatgimin somoio bijoli dongjawa.
Unbaksana kosako janapgimin apsan tarikrango, Loc 24-27, Loc 90-91 aro Loc 61-62 jolni bol wa·arangko den·roke galnagita 132 KV Ampati-Phulbari D/C Tower Line ko pringni 8:00 bajioni 2:00 bajiona bijoli den·aniko dakangskagen jeon Phulbari, Tikkrikilla, Rajabala aro Raksamgre jolrangoba bijoli dongjawa ineba u·iatangaha.
