Da·al salni bako Rongara, Gulpani Nokat-o A·bani dol a·dok sorkarini dakchakanichi jackfruit processing unit ba te·brongoniko dingtang dingtang cha·anirangko tarichakram a·damko a·dokni Chief Minister Dr. Conrad K. Sangma oprake on·angaha. South Garo Hills a·jao “A·bani”, ia jackfruit processing unitko game cha·giparangni janggi tangani gadangrangko namdapatna aro tang·doatna miksonge dingtangmancha a·bachengataha.
Chief Minister Conrad Sangma, ia a·damko oprake on·a man·anina kusi ong·aniko parakangaha aro indakgipa cha·ani tarichakramrangko te·brongna mangmangsa tariaigija gipin biterangoniko cha·ani tarichakramkoba bikotna sorkari kam ka·anggen ine aganangaha. Ia a·damko crore 2 mang tangkarangchi rikaha jeon 100 KW solar bijolichi chalaianggen ine Sangma parakangaha. Iasan ong·aigija ia biapko dingtang dingtang a·sel ong·ani somoirango dongchakna man·agitaba tariaha ine Sangma aganangaha.
Ia te·brongoniko cha·ani tarikchakramna salantian lakh 1 ba lakh 2 tangkarangko jakkale biterangko manderangoniko bregen aro uko chips, jam, powder aro ming 20 bosturangko tarina miksongenga ine Sangma parakangaha. Ia a·damo kam ka·na sak 150 me·chikrangko skie rakkianggen aro chadamberangna kamrangko ong·katatgen ine Sangma aganangaha. Iasan ong·aigija Meghalaya a·doko te·brongoniko cha·ani tarigiminrangko Russia aro Europe rangoni am·atgiparang dongengaha ine Sangma agandapangaha.
Ia processing unit ko kulie on·anichi, SGH a·jao te·brongko ge·giparang uamangni ge·aoniko man·gimin biterangko indin soe galna nangjanagita namen dakchakaniko ra·bagen aro ia a·damona uamang an·tangtangni man·gimin biterangko pale sim·e cha·nagita cholko man·anggen ine Anand Foundation ko a·bachengdilgipa Retd. Major Ajit Singh aganangaha.
Ia jackfruit processing unit ko a·gilsako mingsingbegipa architech rangoni sakgni chongmotan Aveenesh aro Neha riknagita tarie on·angaha.
Education Minister Rakkam Sangma, tom·aniona sokbagipa manderangna ia sorkarini namgipa kam ka·anirangko jekai rama jal·angrangko tariani aro mikkangchi songrebagipa manderangna dingtang dingtang tourist biaprangko namdapatani bidingoba aganangaha. Una agreba Amlarem ni MLA Lakmen Rymbui, Chokpotni MLA Sengchim Sangma, Baghmarani MLA Kartush R. Marak, GHADC ni CEM Albinush Marak aro a·jani DC Shivansh Awasthi programo dongpae bakko ra·angaha.
