Da·al salo Tura Civil Hospital Conference hall-o Nasha Mukt Bharat Abhiyan ni bakgita, Addiction Treatment Centre (ATC) ko ma·mong sorkarini Social Justice & Empowerment Minister Dr. Virendra Kumar Video Conference-gita oprake on·angaha. Miss Indu Verma, Project Monitoring Unit (PMU), State Coordinator, Ministry of Social Justice & Empowerment, Government of India ko ia ATF ko virtual inauguration ko dakaniko nirokchina gita Ministry oni watataha ine u∙inagita man∙aha. Ia oprake on∙anio a∙jani DC Jagdish Chelani, SP Abraham Sangma, Medical & Health Officerrang aro gipin officialrangba dongpae bakko ra·angtokaha.
Ian Meghalaya a·doko dingtangmanchagipa centre ong·enga jeon pekgipa bosturangko jakkalaniko champengna aro chadamberangna mikrakataniko on·a miksonge a·bachengataha. Ia centre New Delhi ni National Drug Dependence Treatment Centre (NDDTC) aro All India Institute of Medical Sciences (AIIMS), Ministry of Social Justice & Empowerment, Government of India ni dakchakanichi kulie on∙angaha. Ian Garo Hills ni chadamberangni dingtang dingtang pekgipa bosturangko jakkalaoniko naljokatna aro sannaniko on·e uamangni janggi tanganiko dingtangatna jaku de∙ani ong∙a.
