February 8 tariko Nengbapara songni Nokma Sordar, AHAM Bawagre Sub Unit ni Vice President Briwat Sangmani dongpanio JJM-ni kamrang matchotjaengani bidingo Tura North Division, PHE ni Executive Engineer na lekka sedoataha.
Seatgipa chittio janapatanio, Right To Information (RTI) ka·e ma·sie ra·anigitade Bawagre Water Supply Scheme-na chamgimin crore 2.24 Lakh tangkarang ong·a ine AHAM dolrang aganangaha. Ia scheme ni ning·o song ge 5 ko man·gopna miksonggimin ong·a chongmotan Bawagre, Ajurigre, Dildegre, Nengbapara aro Uringgre ko tarina donaha ine uamang parakataha.
Ia Scheme Jal Jeevan Mission (JJM) ni ning·ao chamatgimin ong·a jekon 29 July-ni 2022 bilsio a·bachengataha aro kam ka·aniko October 2023 oni da·alona kingking dontongaha ine AHAM dol u·iataha. Uamangni janapatanigitade nokantiona salgipa Functional Household Tap Connection (FHTC) matchotkujaenga aro je nokdangrangona pipe teke on·manahaoba chiko man·sokujaenga ine parakataha.
Ia kamrangni bidingo kusi ong·gijaniko parakate Tura North Division, PHE ni Executive Engineer ko nirokatpachina chittio mol·mola baksa didiataha. Uamang iani bidingo Executive Engineer baksa agangolpogrike nion ia obostarangko nirokatna ua ku·chakaha ine uamang janapatjolaha.
