Mijal salni bako A·chik Holistic Awakening Movement (AHAM), Central Executive Body (CEB) HQ Tura ni General Secretary Mr. Clinton Marak, Resubelpara ni Municipal office ona re·ange PMAY scheme ni bidingo singdoaniko dake chittiko on·angaha.
Resubelpara ni Municipal areao napgipa songrang chongmotan Babukona, Babupara aro Khaldang Rongsrek o, Pradhan Mantri Awaas Yojana – Urban (PMAY-U) jekon manderang bang∙bate BPL ni nok ine u·ibata. Jolni bang∙bata songrango PMAY nokko man·giminrang tangka paisarangko ru·utbea somoirangna man·jae an·tangtangni nokrangko rikanio chu∙soksrange rikna gita man·jaenga ine AHAM dolrang janapangaha. Kosako janapgimin songrango 2019 bilsirangoni nokrangko rikna gita a·bachengataha, indiba da·ona kingkingba bon∙kamgipa man∙a nanggipa tangka paisarangrangko on·kujaengani a·sel beneficiary rang namen neng∙nikanirangko man·enga ine songdongenggipa manderang u·iatangaha.
Kobor rangko man∙soani gitade Block Development Office rangnigita PMAY scheme ko man·giparangde taraken bill rangkoba man·a indiba urban areao Municipal ni gita PMAY scheme ko man·pagipa beneficiary rangde maini gimin man·skajaenga ine bang∙a beneficiary suk ong∙gijaniko parakataha. Indake ong·engon AHAM dolni gita nirokenggipa departmentko iani bidingo ta∙rakale nirokate kamrangko ka·pachina aro man·a nang·enggipa beneficiary rangna tangka paisarangko on·china chitti seachi u·iataniko dakangaha. Unbaksana maini gimin indita bilsi ru·utbegenchimoba beneficiary rangna tangka paisarangko on·a man·kujani bidingo AHAM aro PMAY nokko man∙giparangna department ni dilgiparangko talate on·chinaba didiangjolangaha.
