Da∙al salni bako Dadenggre Sub-Division ni ning·o ong·gipa Lower Primary skulrango sak 192 skinagita seokako man∙gipa gital skigiparangna a∙dok sorkari appointment letter-rangko Tura ni District Auditorium-o on∙angaha. Battanggimin somoioba apsan daken sak 458 gital seokako man∙gipa skigiparangna a∙dok sorkari appointment letter-rangko on∙angaha.
Ia Teacher Initiation Conclave Program ona Education Minister Rakkam A. Sangma mongsonggipa ong∙e sokbaan baksana Power Minister A T Mondal, Selsella ni MLA Arbinstone Marak, MIDC ni Chairman James P K Sangma, a∙jani DC Jagdish Chelani aro gipin Officer-rang dongpae bakko ra∙angaha. Gital rimnapako man∙gimin skigiparangko nama skaniko on∙an baksana, saksa skigipa ong∙e poraia skiani a∙bao chadamberangko tang·doatna man∙agita an∙tangtangan jako ra∙e aro bimchipe dangdike on∙a nanga, maina mikkangchi chadamberangni chu∙sokaniara skigiparangni rasongan ong∙a ine Rakkam Sangma aganangaha.
Batanggimin bilsi gittamrangni gisepo skulrango skigiparang dongjae chatro chatrirangni bidani a∙bao branganirangko nikagita man∙e, Sangma uni Education Minister ong∙ani bilsisa ni gisepon sak 1000 mangna batpile gital skigiparangko rimnapanio chu·sokgipa ong∙na man∙anikoba janapangaha. Uandake gital rimnapako man∙gipa skigiparangko bida ni a∙bao chadamberangko tang·doatna aro chu·sokgiparang ong∙atnagita an∙tangtangko on∙kange bimchipe kamko ka∙angchinagitaba Sangma didiangaha.
Apsan daken a∙dok sorkari aro Education Minister ni bidani a∙bao chadamberangko ra∙dona rakken kamrangko ka∙enganina mittelangan baksana gital rimnapako man∙gipa skigiparangna, MIDC ni Chairman James Sangma nama skaniko on·angaha. Unbaksana chadamberang mikkangchi jatko a∙songko dilnasienggiparang aro uamangko dilgiparang ong∙atnagita skigiparangni jakon ong·a ine aganenba pilak skigiparangko a∙dokni silroro namroroanina skiani a∙bao nambate dangdike on·angchinagita James Sangma didiangaha.
