AHAM Central Executive Body, HQ Tura ni President George Prince Momin, Tura songjinmani ning·o donggipa adita rama dilrangko tarie on·china Chief Minister Conrad Sangma-na chittio see mol·molataha. Skanggipao ua Chief Ministerko uni dilanio Meghalaya a∙dokna namgipa kamrangko ka∙anina aro Tura o re∙angggipa somoirango Governor House ko ra∙baan baksana a∙songni President ko 5 gipa Meghalaya Games ona sokachakate Administrative Complex ko riknagita pangchakani ro∙ongko songe on∙anganina AHAM dolni palo mittelpilskaaniko janapatchengaha.
Tura songjinma Garo Hills ni skotong ong∙e bang·a biaprangona re·chakatgipa ong·genchimoba rama jal∙angrangni bidingo adita neng∙nikanirangko cha∙grongengkua ine AHAM dolrang u·iataha. Ia rama jal∙angrangko namdapatchinagita uamang nirokna nangchongmotgipa ramarangko CM na chitti seachi janapangaha.
Tura songjimaona re∙gipa rama dilsasan ong∙anichi Dermile ba Civil Hospital ramagitan gari gorarang napna nangani a∙sel mikkangchi maiba ong∙telaigipa obostarangko cha∙grongna nanggenchimode, gipin ramarang dongjani a∙sel namen neng∙nikaniko ra∙banaba donga ine AHAM dol aganangaha. Unbaksana songdongengipa manderangni batrikrikani gimin, unbaksana Phulbari, Dhubri, Dalu, Bangladesh, Baghmara aro gipin biparangoni ia ramagitan songreani gimin gari re·anio apchangketani batrikrikanggen ineba aganangaha. Iani bidingo Saliramo New Tura oni Dobasipara ona aro Salgro-o Dakopgre oni Chandmari ona ramarangko tarina man∙genchimode aditan neng∙nikanirangko komiatna man∙anggen ine AHAM ku∙pattianiko on∙angaha. Tura songjinmao ramarang chonani a∙sel apchangket ong·anirangko namdapatna ge·gipin re·sotgipa ramarangko ra∙bachinaba didiangaha.
Tura ge∙sa tang∙dobaenggipa biap ong∙e, mikkangchi dal∙dapangna aro namroro silroronagita namgipa ramarangko tarianian mongsongbatgipa ong∙enga ine AHAM dol parakataha. Dingtang dingtang a∙jarangoni, Northeastni a∙dokrangoni aro Bhutan, Tibet, Nepal oni songregiparang North Tura oni Paikan ona re∙gipa ramako re∙rongani gimin adita namdapatanirangko dakchina uamang didiataha. Unbaksana West Tura oni Phulbari ramagita Brahmaputra chibimako dollong ka∙batanichi aro South Tura oni Dalu gita re∙gipa rama ge∙sa Bangladesh sima ari jol ong∙ani gimin Dhaka oni songrebagipa manderangna nambata re∙a doaniko ra∙bana riting 4 ramako tarichina AHAM dol mol∙molangaha.
Uni constituency ni manderangna namgni ong·china aro Turani namroro silroroanina ia nangchongmotgipa kamrangko niatpachina Momin, AHAM dolni palo Chief Ministerko mol·molataha.
