Da·al pring walni 2 baji mangni somoio NGH Berubari sepangjolo donggipa Hudakona songo sko tik ong·gijagipa mande saksa songtangni mande Bondam Momin ko so·otaha ine koborko man·soaha. Ia sko tik ong·gijagipa mandeko Sonith Sangma minga jean abitanggipako dokprete donange apsan walon Bondam Momin ni nokchi re·ange, uni tusimiting somoio nokni pakmarangko den·prake kuturi ning·achi napange so·ote donangaha. Ia obosta ong·anio abitanggipa rasong gnangbee siaoni jokaha jekon da·o Goalpara Solace hospitalo sanna bannaniko dakenga ine parakataha.
Songni manderangni agananigitade batanggimin somoirangoba ia sko tik ong·gijagipa mandeko songni nokni manderangni nokrangko denprake atte gitchi ra·e den·a su·na am·anirangna pulisrangni jako on·ahachim jeon pulis dolrang uko maiba rim·a kal·a dongani a·selsa pagla dakenga ine sanna bannaniko dakchinagita watatpilaha ine parakataha. Apsan daken ia sko tik ong·gijagipa mande ia a·sel ong·na skang abitangko dokprete gipin nokona re·ange so·otani ja·manoba sakgipin nokrangchi re·ange kajia golmal ka·eanichisa ma·sina man·e songni manderang uko rim·e pulisrangni jako pakwatate da·o thanao donenga ine koborna parakataha.
