Meghalaya a·doko koelarangko bikotna chu·ongagita license rang donge ge 17 dorgastoko galgiparangoni ge 4 ko Ministry of Coal ra·chakaha ine Meghalayani Mining & Geology department u·iatangaha. A·doko koela bikotani bidingo u·iataniko Single Member Committee, Meghalaya High Court baksa melie parakataha.
Batanggimin chango ma·mong sorkarini koela bikotna ra·chakaniko, ia sak 4 dorgasto galgiparangni koela bikotna miksonganirang baksa on·anio pangchake Ministry of Coal-ba ra·chakaha ine chang 20 gipa interim report o committee parakataha. Koela bikotnasienggiparang Environment Clearance ko matchotatna, a·dok sorkari aro ma·mong sorkarini jako ra·giparango dorgastoko galmanaha jekon ra·chaknagita nangkuenga ine parakataha. Unbaksana ming 2 geological report rangko ma·mong sorkarini Ministry of Coal-ni ra·chakaniko a·dok sorkarini Mining & Geological Department janapangjolaha. Indake ong·genchimoba ge 2 dorgastoko galgiparangna koelako bikotna ma·mong sorkarini ra·chakaniko aro koela bikotna nanggipa mangsonganirang baksa on·ama on·kuja uko janapatani dongkuja ine report o parakataha.
Koelarangko bikotna Rule 42 (2) of Mining Concession Rule, 1960 ni ning·o ra·chakako man·gipa sak 4 dorgasto gal·giparangara East Jaintia Hills a·jani Rymbai Synrang Shahkhain songoni Nehlang Lyngdoh, Ranikor C&RD Block South West Khasi Hills a·jani Nongbri Nongkulang songoni Maksing Sibren, East Jaintia Hills a·jani Byndihati songoni Thomas Nongtdu aro West Khasi Hills a·jani Sdaddkhar songoni Wenni Diengngan ong·a. Ia sak 4 manderang Environment Clearance ko matchotatna dorgastoko galgiminrang ong·a ine ma∙mong sorkari u∙iataniko on∙angaha.
