Mija re·anggipa February 10 tariko Megh Farm Processing Hub aro Prime Hub-ko nokdong gaona Meghalaya a·dokni skotong Minister Conrad Sangma-ni re·baani somoio AHAM Bawegre Sub-Unit Nengbapara Bawegre jolni adita nangnikanirangko janapate tarake niatpachina chittiko pakwatangaha.
Memorandum-o janapatanigitade uamang skanggipao jolni manderangna saa ding·ani somoirango sanna bannaniko ra·na neng·nikaniko man·engani gimin Health Sub Centre ko ra·bae on·china mol·molataha. Sanchakram a·damrang dongjaengani a·selo songdongenggipa manderang songni buringrangoniko sambolrangko sandie saa ding·ako an·tangtang sanna nangao ga·akenga ine AHAM dolrang u·iataha.
Gitalgipa sanchakram a·damko rike on·genchimode wilwilao donggipa bang·a songrang jekai Bawegre, Nengbapara, Uringgre, Ajurigre, Tosinpara, Rongmakgre, Angke Rongdikgre, Dildegre, Songgitalgre, Songgitchamgre, Jengritgre aro gipin songrangna dakchakbeani ong·gen ine uamang parakataha. Ia songni manderang nangchongmotgipa sanna bannaniko ra·na ge·sa kamkam dongenggipa Tikrikilla Community Health Centre osa pangchakna nangenga ine AHAM dol aganangaha.
Gnigipao uamang Uringgre songoni Jangrapa antiona re·gipa sorokni namgijaniko janapate tarie on·china mol·molataha. Ia sorokrang wachi karini somoio namen a·dubekrara dakgipa ong·ani a·selo salanti re·ruraanio neng·nikaniko man·ronga aro tarake tarina nangchongmotenga ine AHAM dolrang aganangaha.