West Garo Hills a∙jani Tikrikilla o bijoliko watgija bijolini billrangko sokatanina A∙chik Association for the Protection of Environment (AAPE), Civil Society A∙chik Welfare Organization (CSAWO) aro Constitutional Rights Forum (CRF) dolrang nangrime a∙dokni Chief Minister Conrad K. Sangma na matnangate chitti see u·iatangaha.
Tikrikilla jolni Dobongjora, Dabanggre, Bolsaldamgre, Daigre aro Diganpara songrango bilsi brina skangan meter boxrangko tekmanahaoba aro bijoli silitingrangko sringmangenchimoba da∙ona kingkingba bijoli watatanirang dongkuja ine uamang janapangaha. Dabangjora songo mitam nokkingrangsan bijoli sringanirangko man∙aha aro uamangba bilsiantian bijolini billrang tang∙doaniko niknagita man∙rongani a∙selo namen neng·nikanirangko chagrongenga ineba janapangaha.
Indakgipa obostani a∙selo wilwilao songdongenggiparang neng·nikaniko man·an baksana mosongbate poraienggipa chatro chatrirang namen neng·nikanirangko man∙rongenga ine parakataha Iani bidingo kosako janapgimin NGO dolrang songdongenggipa manderangni palo sorkari aro jako ra·enggipa departmentko namedake nirokatpachinagita didiangaha.
