Da·al salni bako a·dok sorkarini Cabinet tom·anio adita chanchirimairangko dake ming bonga bill rangko ra·chakna raiko on·angaha. Skanggipao Meghalaya State Investment Promotion & Facilitation Bill (MSIPF), 2024 ko bimang ong·atnagita tom·anio ra·chakangaha. Ia bill ko ra·baanichi Investment Meghalaya Authority ko nakatate a·doko dingtang dingtang a·bao kam ka·aniko tang·doatna dakchakanggen.
Re·anggipa somirango Single Window Agency ba ge·sa nirokgipasan chu·gimik kamrangko nirokaniko niknagita man·angaha indiba ia bill ko ra·gatanichi jerangan a·doko dingtang dingtang a·bao kam ka·na miksonggiparang online portal o uamangni applicationrangko on·agita man·anggen. Ia nipiltaianiko dingtang dingtang department rang nirokate kamrangko ka·anggen ine parakataha.
Gnigipao, Supreme Court ko Second National Judicial Pay Commission (SNJPC) nigita Judicial Magistrates/Judicial Officer rangna on·gimin tangka paisarangko ma·mong sorkarini on·gipao pangchake bariatnagita nanga ine janapanikoba chanchirime ra·chakangaha.
Gittamgipao, Retired Judge aro Chief Justice rangna bako ong·e kam ka·angkuna aro uamangna tangka paisanigita dakchakna 2016 o ra·gatgimin niamo pangchake Judiciary ni mol·molatanikoba ra·chakangaha.
Una agreba re·baenggipa Assembly Session na skang adita niamrangko Bill ona ra·gate namdapatnagita ra·chakangaha jean Captain Williamson Sangma State University Act, 2011 aro Contingency Fund of Meghalaya Bill, 2024 rang ong·a.
