Turani MDC Bernard Marak, Assam a·doko da·ororo Christian Missionary rangni chalaienggipa skichakram biaprango neng·nikanirang aro sinjetanirangko on·enganina Assam ni Chief Minister Himanta Biswa Sarma na kraa ja·kurangko de·e nirok simsakatpachina chitti see mol·molataha.
Assam a·doko Christian Missionary rangni chalaienggipa biaprango Christian rangni gitcham dakbewalrangko ja·rikaniko dakenganina, Satya Ranjan Borah minggipa mande saksani Christian Missionary ni chalaienggipa skichakram biaprangko miksongmanchae chadrape, ka·o nange matnange aro niamgri sinjetanirangko on·enganiko social media rango niksonagita man·angahanina Marak suk ong·janiko janape u·iatangaha.
Christian Missionary rang ru·uta bilsirangonin an·tangtangni daka rikanirangko ja·rike a·doko maming kajia golmal gri tom·tome dakbaengani gisepon da·o indakgipa sinjetanirangko on·engani a·selo Christian toromo bebe ra·gipa manderangna namen kenbeani ong·enga ine Marak chittio janapataha.
Indake Assam a·doko donggipa Christian toromo bebe ra·gipa ka·rimskarangna kenbeani ong·enganina, ia obostarangni bidingo nirok simsakataniko dake uamangna dakchakaniko aro naljokaniko on·a man·agita ta·rake tomtomaniko ra·bana nirokaniko dakatpachina Assam ni CM ko mol·molataha.
