Da∙al pringni bako Tura Municipal Board (TMB) nigita ong∙atgipa tom∙bimonganiona Tura Parliamentary Constituency ni MP Agatha K. Sangma mongsonggipa sokgipa ong∙e Gandrak Dare Beautification Project ko oprake on∙angaha. Apsan daken TMB ni Chief Executive Officer, MCS R. R. Marak, TMB ni Chairman, Retd. MCS J. D. Sangma aro TMB ni Senior Medical and Health Officer, M.J.G. Momin ba tom∙aniona re∙bae bakko ra∙angaha.
Ia tom∙bimongani bako Gandrak Dare ni sepangjolo songdongenggipa adita manderang uamangni kusi ong·aniko parake adita neng∙nikanirangko janapengon, Gandrak Dare ko sildapatna aro nitoatna Project ko ra∙baanina department rangko mittelan baksana songdongenggipa manderangko ia tarie on∙gimin biapko sorkarinisa ine chanchiaigija an∙tangtangni gamjin ine chanchie simsake rakkie jakalchinaba Sangma mol·molangaha. Unbaksana uamang Forest Department aro Soil Conservation Department rangko dare kosak jolo “afforestation” ba bol wa∙a rangko ge∙e nirokatpachinagitaba mol·molangaha.
Songdongenggipa manderangni janapanigitade 2000 bilsirango ia dareni chi tiprongijagipa ong∙genchimoba somoirang re·anga baksa da∙o ia dare ni chi tapanirangko chagrongna nangengaha jean Upper Chandmari jolo songdongenggipa manderangna bilongen china dilaniko aro neng∙nikaniko on∙angenga.
Ia project ko chu∙sokatna man∙anina MP Agatha Sangma uni kusi ong∙aniko janapangaha. Unbaksana ia project ni ning∙o street library ko tarina uni miksonganiko chu∙sokatna man∙ahaninaba Sangma uni katchaaniko parakangaha. PA Sangma ni Assembly rango agangimin kattarango pangchake lekka tarigiminko aro Mahatma Gandhi ni gimin dongipa lekkarang baksa an∙tangni namnikgipa lekkarangkoba MP Agatha Sangma street library na ka∙sae on∙gilanganiko dakangaha.
Ia Gandrak Dare Beautification Project na MP Grant Aid nigita Lakh 50 tangkarangko chamate Dare aro wilwilako sildapatani kamrangko ka∙angaha. Ia project ko ra∙baanichi Gandrak Dare ona nina re∙bagipa manderangna adita a∙songchakanirangkosan on∙aigija, mikkangchi Tura songjinmao damsa rona rotobegipa biap ong∙anggen.
