GHADC o kam ka·enggiparangni man·a nanggni dormaharangko bilsi 3 ong·nasipiloba on·kujaengani bidingo uno kam ka·giparangni neng·nikanirangko chagrongenganiko nigrikate dormaharangko on·china aro on·a manjagenchimode kamtangko watchinagita GHADC ni CEM Albinush Marak ko matnanga gnang Rongrong ni MDC Rinaldo K. Sangma chitti see u·iatangaha.
Ia chasongo salantio jakkalna nanggipa bosturangni damrang batroroenganiko niknagita man·an baksana bi·sa desarangna skul admission ka·e on·a nangani somoirango GHADC o kam ka·giparang namen neng·nikanirangko chagrongna nangenga aro iako CEM an·tangan u·ichakna nanga ine Sangma chittio janapataha.
Battangimin 2021 bilsionin 15th Finance Commission Award ni ning·o crore 100 ko GHADC na ma·mong sorkarinigita chamatmanahaoba aro minor, major, motor vehicle tax aro gipin kajinarangko bilsiprakon crore 60 rangko man·o mangba GHADC o kam ka·giparangna gong·sa pelsako mangba maina on·a man·jaenga ine Sangma matnange sing·doataha. Unbaksana Garo Hills ni manderangoniko indita crore kajina man·gimin tangka paisarangara bachi gimaskaenga ine MDC Rinaldo Sangma sing·doanikoba dakangaha.
Una agreba CEM uni ka·rimskarangna aro executive rangna crore ni tangka paisarangko tol·gipa billrangko tarie gamaniko dontongate, GHADC ni ning·o kam ka·e cha·giparangna uamangni man·a nanggni dormaharangko on·a nanganiko mikkango done kamko ka·na nanga ine Sangma didiataha. Garo Hills o GHADC ni indakgipa obostao ga·akaniara namen kratchaaniko ra·baani ong·a aro dormahako ta·rake sokatchina didiatan baksana dormahako on·a man·jaode uni CEM ni gadango kam ka·aniko watchinaba u·iatangaha.
