Da·al salni bako A·chik Conscious Holistically Integrated Krima (ACHIK) dol Tura Najing Bazaar ni Hotel Polo Orchid o tom·aniko dake adita nanggipa kamrangni bidingo chanchirimangan baksana gital memberrangkoba seokangaha. Ia tom·e chanchirimanio, mikkangchi ACHIK dolni dakna nanggnirangko see rakkie kamrangko ka·angnagita miksonge ong·atangaha.
ACHIK dolni President Thomas M. Marak ia tom·aniko dilangaha, unbaksana General Secretary Jack A. Sangma, Vice-President Greneth M. Sangma, Education Secretary Macklawrance M. Sangma, Chief Organizing Secretary Hamrash N. Marak, SGH jolni Co-Chairman Brejio M. Marak aro WKH ni Co-Chairman Chakin Marak ba sokbae wilwilani adita neng·nikanirangko chel·atnagita ku·mong nangrime kam ka·angna tik ka·angaha. Ia tom·anio ja·pang ja·diloni niate kam ka·ani gamchatanirangko ja·rikna aro songsalko bilakbatate namgipa dingtanganiko ra·banagita dolni memberrang chanchirimangaha.
Ia tom·e chanchirimanio adita gital memberrangko Co-Chairman na Silman D. Sangma, Organizing Secretary na Happynews R. Marak, Sports Secretary na Ryan Macky, North West jolni Co-Chairman na Anand R. Marak aro EGH jolni Co-Chairman na Daewish S. Marak seokangjolaha. Una agreba me·chikma dolni memberrangara Mebi R. Marak, Sheila Ch. Sangma, Swery D. Marak aro Tura songjinmao kamrangko niroknagita Manisha G. Momin ko Women Wing na seokangaha ine janapangaha. ACHIK dolrang an·tangtangni gisepo adita kamrangko rakbate ka·nagita gital ku·michetanirangkoba dakangjolaha.
