Mijal sal February 16 tariko, South Garo Hills Gasuapara block ni ning·o donggipa Ruga Doni antiko cha·e Dabinggre songona re·angpilenggipa Mahindra Bolero Pickup saljatchimang somoio a·selko chagrongaha ine koborna parakataha. Ia a·sel ong·anio saksa ma·gipa a·damon sikamaha aro gadopagipa saksni gipin manderangba namen saknaaniko man·aha.
Sianggipa, saksa Jijikapara Baptist mondolio dangdike on·enggipa Birbal M. Sangma ni jikgipa ong·a ine koborko man·soaha. Ia a·selo saknaa man·gipa manderangko bakan Dalu hospitalona ra·angaha aro sianggipani manggisiko Dimapara thana ni pulisrang baksa agangolpogrike North Garo Hills Dujong songona ra·angaha ine u·iataha.
