Da·al salni bako a·dokni Chief Minister Conrad K. Sangma mongsonggipa sokgipa ong·e South West Garo Hills, Ballonggre ona re·bae Bulk Water Supply project, MegARISE aro ge 13 Areca Nut Processing Unit ko oprake on·angaha. Ia program o Tura ni MP Agatha K. Sangma, a·dokni Speaker Thomas A. Sangma, PHE Minister Marcuise Marak, Rangsakona ni MLA Subir Marak, WGH ni DC Jagdish Chelani, SWGH ni DC R P Marak aro gipin Officer-rang dongpae bakko ra·angaha.
Public Health Engineering (PHE) departmentnigita Bulk Water Supply project NESIDS ni chamatako man·gipa gong 100 crore mangni kam ong·a. Ia scheme ni ning·o Ganol chibimaoniko Tura aro wilwilao donggipa WGH aro SWGH ni blockrang jekai Rerapara, Rongram, Gambegre ona altuae chirangko sokatna dakchakanggen ine Chief Minister Conrad Sangma aganangaha. A·dokni pilak department rango kamrangko ka·nagita sorkari jotton ka·enga aro da·o dipet JJM ni kamrangna hajal 3 crore mang paisarangko jakkalangaha ine Sangma agandapangaha.
Da·al salo MegARISE projectkoba oprakangan baksa Ganol chibimako tangkame rakkina jotton ka·enggipa songni manderangna Payment for Ecosystem nigita lakh 65.36 cheque rangko sualangaha. Iasan ong·aigija WGH ni ge·sku block rangna chong·motan EGH ni ge·gittam, SWGH ni ge·bonga, NGH ni ge·gittam aro SGH ni ge·dok blockrangna Lakh 87.77 tangkarangni cheque ko Green Meghalaya nigita sualangaha.
Sorkarini bang·a ra·baenggipa schemerangni namgniko ra·chinagita Chief Minister a·dokni manderangko didiangaha jeon ua mikkangchi a·doko kajina man·aniko 10 billion ona ra·dona sorkarini jotton ka·enganiko parakangaha.
