Da·al salni Meghalaya Budget Session o Mawhati ni MLA Charles Marngar, Khasi aro Garo ku·sikko Eighth Schedule o napatna ru·utaniko janape iani bidingo ma·mong sorkarioni maiba aganchakanirangko man·soahama ine Assembly-o sing·doangaha. Sing·anirangna aganchakengon Chief Minister Conrad Sangma, ma·mong sorkari iani bidingo Meghalaya sorkarina changgni dake aganchakaniko on·ataha ine parakangaha.
Ma·mong sorkarini 2019 bilsini March 22 tariko aganchakatanigitade ku·sikrangko jakkalani aro ra·napani kamrang namen ning·tubegipa ong·ani a·selo iani bidingo dongimin niamrang dongkujaenga ine Sangma u·iatangaha. Indake ong·engon, Leader of Opposition Ronnie V. Lyngdoh, dingtangmancha a·dok sorkariko Garo aro Khasi ku·sikko Eighth Schedule o ta·rakkale ra·napna kam ka·chinagita mol·molangskaaha. Iani bidingo MDA sorkarini a·bachengaonin kamrangko ka·baenga jekon da·ona kingkingba ma·mong sorkari baksa a·dok sorkari chol man·a changantin pangnan agangolpogrikaniko dakenga ine Chief Minister agandapangaha.
