Da·al salni Meghalaya Legislative Assembly-o Amlarem ni MLA Lahkmen Rymbui bilsiantio gueni damrang tang·onaniko janape ge·e man·gimin biterangko a·doktango aro a·palchi bading chiwalna sorkarioni maiba dakchakanirangko on·engama ine sing·aniko dakangaha. Uamangni sing·anirangna, sorkarinigita gue ge·e cha·giparangna a·dok gimiko ge 46 co-operative society rangko niroke bang·a dakchakanirangko on·enga ine Agriculture & Farmers’ Welfare Minister, Ampareen Lyngdoh aganangaha.
Sorkarinigita co-operative society rangna dingtangmancha skie on·an baksana uamangna biterangko donchakna nokrangko rike on·enga jeon bigilrangko kikna aro ran·atna man·enga ine Lyngdoh aganangaha. Iasan ong·aigija mitam game cha·giparangna tangka paisarangchi dakchakanikoba on·enga ine ua u·iatangaha.
India sorkarini guerangko badingna Minimum Support Price (MSP) gong 200 damko donani bidingo a·doko biterangko nama damrango bariate palna man·agita niatpachinagita Lahkmen Rymbui sorkariko mol·molangaha. Chief Minister Conrad Sangma nirokatnagita ka·dongani kattarangko on·e, man·a dipet a·doko game cha·giparangko dakchakna jotton ka·anggen ine aganangskaaha.
