Brigipa Meghalaya Legislative Assembly ni salo Education Minister Rakkam Sangma, Captain Williamson Sangma State University ko rika cho·ani kamrang da·o dipet Academic block, Administrative block, me·asa aro me·chikrangni hostelrangko rikmanaha ine Sangma parakarangaha. Iasan ong·aigija campus ning·ao ramarangko tarina, chi salna dorgasto ra·chakaha, Board of Governors’ aro Board of Management-ko songmanaha, unbaksana ge 58 kamrangko Vice Chancellor aro Registrar baksa rim·napna tik ka·angaha ine Sangma agandapangaha.
Campus-ko chu·gimik rika cho·ani kamrango da·ona kingking gong 16.96 crore rangko jakkalaha aro ramarangko tarina aro chirangko salna gong 5.77 crore chamataiaha ine VVP dolni Mawlai MLA Brightstarwell Marbaniang-ni sing·anina Sangma aganchakangaha. University-na chamatgimin 58 kamrang mangmangchi bang·a department rangko chalaina chu·ongjawa aro iani bidingo mikkangchi bariatna miksonganiko sing·on, ge 100 kamrangona bariatna sorkari ra·chakmana ine Sangma u·iatangaha.
University ko a·bachengatna 2024 bilsio miksongahaoba re·baenggipa Lok Sabha election ni Code of Conduct rangni a·selo kamrango rimnapna neng·nikani ong·naba donga jeon kamrangko matchotatna man·ode ia bilsion a·bachengatgen ine Sangma aganangaha. Election ni a∙sel maibakai man·jagenchimode 2025 bilsio a·bachengatna jotton ka·angskagen ine Sangma aganangaha.
