Batanggimin salrango Chokpot jolni Dareng chiring sambaniko niam gri rong·te bikotaniko dongtongchinagita daito donggipa department rangna, MLA, MP aro skotong Minister na namnikgijaniko u·iatani ja·manoba maming ja·ku de·e kamrangko nirokatkujanina jolni NGO dolrang mijal salni bako ua biapona re·ange ro·ong bikotna jakkalgipa kolrangko dontongatan baksana quarry ko chipe donbaaha. Changni chang niam gri rong·teko bikotanina beng·atan baksana iani bidingo janapgenchimoba maming ja·kurangko de·jani gimin ia biapo kam ka·giparangko NGO dolrang raken ka·mikkenataniko dakangaha.
Ua ro·ong bikotchakram biap Dareng chiring ni sepangon ong·e bang·a moilarang chio sikkonge dongenga. Jolo songdongenggipa manderang an·tangtangni nanganina ia chiringon pangchake jakkaltokengani gimin bang·a neng·nikanirangko chagrongenga ine NGO rang janapangaha.
