Da·ororo mongmarangni mandeko kal·ake siatani aro nok jamrangko nosto ka∙anirangko chagronganirang batrorobaenganina, Ranikor ni MLA Pius Marwein brigipa salni budget session-o janapangaha. Indakgipa obostarang ong·enganina maming nirokatanirang dongjagenchimode an·tangtangko aro nokjamko naljoke rakkina mongmarangko so·ote galaona soknaba donga ineba ua aganangaha.
Ia obostarangko a∙doko bang∙en chagrongengani gimin, a∙sel ong∙gipa mandeni nokdangrangna dakchaknagita gong lakh 5 oni lakh 10 ona tang·doatan baksana dingtang dingtang dakchakanirangko on∙agita Chief Minister Conrad Sangma u∙iatangaha. Mikkangchi indakgipa obostarangko chagrongenchimoba matburingrang baksa dakgrikna ja∙ku de∙aniara namgipa ong∙jawa aro indakgipa a∙selko chagrongna nangode Forest officialrangna u∙iate dakna nanggni kamrangko nigrike ka·angnagita man·gen ine Sangma aganangaha.
A∙dok sorkari mongmarangkosan ong∙aigija gimik dakgipa matburingrangni gimin Wildlife Board rang name dake am∙sandie matburingrangni dongram biaprangko u·ina man·agita tracking device rangko tekaniko dakangenga ineba Sangma aganangaha. Da·o dipet a∙doko 1800 mongma rang donga ine survey ka∙anigita u∙ina man∙aha aro mitam momgmarang Bangladesh aro Assam ona napanggiparangba dongani a·selo, Assam aro Bangladesh baksaba melie kamrangko ka∙angna nanggen ine CM aganganaha.
