Brigipa salni Budget Session o re·anggipa jani 13 tariko, Medima Reserve jolo East Garo Hills Rongjengni saksa gari sale cha·enggipako sak 5 manderang WKH Shallangoni Dudhnoi, Assam ona para ra·baenba ka·saninggija dake so·ote galangani bidingo Kharkutta ni MLA Rupert Momin janapangaha. Batanggimin somoirangoba ia biapo so·ote galanirangko niknagita man·aha aro mande donggijagipa bi·ap ong·ani gimin denggu dakgipa manderang cholko ra·ronga ine Momin agandapangaha. Manderangko naljoke rakkina aro mikkangchi indakgipa obostarangoniko naljoke rakkina man·agita ua biapo nirokgipa pulis operation dolko donchina ba Pulis AD Camp ko ra·bae on·china Momin sorkario mol·molangaha.
Iani bidingo aganchakaniko dakengon, Deputy CM (Home in-charge) Prestone Tynsong, Kharkutta Thana-o badi ka·doange da·o am·sandianirangko dake pulis dolrang sak 3 jako donggipa manderangko rim·na man·aha aro gipin dosi donggiparangko am·sandianiko dakangkuenga ine Tynsong aganangaha. Ia apsan dakgipa obostarangko mikkangchi chagrongna nangjanagita NGH a·jani pulis dolrang ua biaposan ong·aigija a·jani pilak wilwilaon pulis operation dolrangko wate nirokataniko dakangenga aro iani bidingo NGH ni SP dingtangmancha nirokangenga ineba Tynsong agandapangaha.
