Assembly session ni brigipa salo Ampati ni MLA Miani D. Shira, Tura Medical College ni rika cho∙anirang aro chalaina dongimin somoirangni bidingo adita sing∙anirangko dakangaha. Uni sing∙anirangna Tura Medical College ni rika cho∙anirangko re∙baenggipa June 2024 o matchotatnagita somoirangko tik ka∙angaha aro kamrangko namen ka∙angenga ine Health Minister Ampareen Lyngdoh u∙iatangaha.
Da∙o dipet Tura Medical College ni dingtang dingtang bakrangni rika cho∙anirangko matchotani aro adita ka·na nangkugipa kamrangni bidingo Health Minister u∙iatangaha. Lyngdoh ni agananigitade Academic block 65 percent, Administrative block 88 percent, Principal na dongchakram biap 91 percent, Type-II block 30 percent, College ni pakmarang 40 percent, me∙chikrangni hostel 35 percent, me∙asarangni hostel 48 percent, hostelrangna retaining wall kaenggipa 72 percent aro Electric sub-station 62 percent mangnigita matchotangaha ine parakangaha.
Una agreba Shillong Medical Collegeko chalainagita dongsogipa hospitalrang jekai Ganesh Das Hospital aro Shillong Civil Hospital rangko jakkale re∙baenggipa 2025 bilsioni a∙bachengatna miksongangenga ineba Lyngdoh agandapangaha.
