Re·anggipa 19 tariko Dainadubi Regional Unit ni AHAM dolrang North Garo Hills ni Additional Deputy Commissioner ko grongenba Chief Minister na dingtang dingtang neng·nikanirangni bidingo chiitiko on·angaha.
Ia memorandum o janapatanirangara Damas aro Chilpara song damgnio Outpost Guard Camp (OGC) ko songe on·chinagita AHAM dolrang dabiangaha. Dainadubi Police Outpost aro Mendipathar Police Station ni ning·ao donggipa Damas songni gisepo chelgrikaniko niate OG Camp ko nangnikaniko janapangaha. Apsandaken Chilpara songba Kharkutta Police station oni chelgrikgipa song ong·e wilwilao donggipa songrang neng·nikanirangko man·engani gimin OG Camp ko songe on·chinagita dabiangaha.
Iasan ong·aigija Dainadubi oni Chitukonako napake Damas ona dakanggipa PWD rama namsrangjahani gimin a·dokni Highway dakatchina AHAM dol didiangaha. Ramako nambate tarie highway dakatgenchimode re·ruragiparangna, ge·e game chagiparangna aro pale sim·e chagiparangna altubegipa ong·gen ine janapange jolni namgnina ia ramako tarake tarie on·china uamang didiangaha.
Dainadubi wilwilao dam 40 na batpile songrang dongani gimin sagipa manderang sanna bannaniko ra·na Dainadubi PHC kosan jakkalna nangao ga·ake namen neng·nikaniko man·enga ine AHAM dolrang janapangaha. Ia Hospitalo chu∙ongagita sanna bannani bosturang dongjani a∙selo bang·bata sagiparangkon Goalpara ba Guwahati ona watatna nangao ga·akronga ine janapangaha. Iani gisepon cholgrigipa nokdangrangoni gipin biaprangchi re∙e sanna bannaniko ra·na chol ong·jae janggi tangko gimaatna nangao ga∙akronga ine AHAM prakangaha. Indakgipa a∙selrangko mikkangchi chagrongaoni naljokna man·agita AHAM dolrang ia kamrangko niatpachina CM na chittiko sedoate mol∙molangaha.
