GSMC dolrang Job Reservation policy aro Garo Hills na ka∙na nanggni kamrangni bidingo Nongalbibrao chanchirimanga

Re∙anggipa February 21 tariko Garoland State Movement Committee (GSMC) ni dingtang dingtang unitrang jean Southern Zone-Baghmara, Nengkra Unit, Dobu Unit aro Nongalbibra Unit-ni dilgiparang Nongalbibra-o tom∙e chanchirimenba Job Reservation-ni bidingo kim·kim ong·e kamko ka·na tik ka·angaha. Da∙o ong∙genggipa Meghalaya Legislative Assembly Session-ni gnigipa salo Mawkyrwat ni MLA Renikton Tongkharni Assembly Sessiono Garo aro Khasi-Jaintia jat gittam man∙gope 80% Job Reservation Policy-ko kanggopani bidingo ra∙chakna man∙gijaniko parakangaha. Uamangni namnikgijaniko mesoknagita jegalaniko dakangan baksana ia Policy-ko A∙chik jat ra∙chakna man∙chongmotjawa ine tom∙anio chanchirimangaha.

Da∙o dongenggipa reservation policy jean Garo-rangna 40% aro Khasi-Jaintia-rangna 40% chame donenggipakon sorkari donangkuchina ine chanchianio tik ka∙e donangaha. Ia 40% Job Reservation-oba batanggimin bilsi 50-o bang∙a backlog rang gnangchim jeon A∙chik chadamberangni kam man∙gnioniko gapatgija donanirangan bang∙en dongkuengachim ine GSMC ni Co-Chairman Balkarin Ch. Marak aganangaha. Iani gisepon 80% reservationko jat gittamna kanggopgenchimode, A∙chik chadamberangna gimagniko ra∙baan baksana mikkangchi kamrangko man∙a ka∙dongani dongjawaha aro susaanio neng∙nikanirangko chagrongna nanggen ine suk ong∙gijaniko Marak parakataha.

Unbaksana A∙chik a∙songo songdongenggipa manderangni neng∙nikanirangko olgrokatchinagita Garo Hills-o namgipa University, College, School, rama jal∙ang, Hospital aro sorkarini Office-rangko kulie on∙chinagitaba GSMC-ni dilgiparang Garo Hills ni MLA rangko dingtangmancha didiataha. Garo Hills-o chu∙ongagita cholrangko man·a nangchongmotgipa rika cho·anirang dongjani a∙sel A∙chik chadamberang susaanio namen neng∙nikaniko man∙ronga. Unbaksana Turaoba Shillongo gitan dingtang dingtang porikka sechakram Centrerangko ra∙bae kulie on∙chinaba sorkariko didiangaha. Ia pilakon niate, da∙alona kingking je 40% Job Reservation-ko Garo rangna dongipako dingtangatanio A∙chik jat ra∙chakna man∙chongmotjawa ine GSMC dolrang u∙iatangaha.