Da·al salo Kharkuttani MLA Rupert Momin, North Garo Hills Mitegittim jolo bang·a ong·gijagipa kamrangko songni manderang chagrongengani gimin Anti Dacoity (AD) camp ko ra·bae on·china assembly-o mol·molangaha. Adokgre aro Mangsangoni km 30 mang chel·gipa Mitegittim song namen diltubegipa ong·a jekon West Khasi Hills, East Garo Hills aro North Garo Hills ni manderang anti cha·enga ine Momin u·iatangaha.
Batanggimin salrango ia biaprango denggu dakgiparang dongnue chakangaha jeon slai gogrikanirangkoba nikna man·angaha ine Momin janapangaha. Bang·a ka·namgijagipa aro signigipa a·selrangoni naljokna man·agita ia jolo AD campko donnagita nangchongmotenga ine Momin parakangaha.
Home departmentko jako ra·enggipa Minister, Prestone Tynsong, Momin ni mol·molaniko niatna ku·chakangaha aro ka·donganiko on·angaha. Unbaksana AD camprangko a·sel obostarang aro nanganio pangchake songe on·agita man·aia ine Tynsong, Dadenggre ni MLA Rupa Marak ni sing·aninaba aganangskaaha.
