Da·al salo Nongthymmai ni MLA Charles Pyngrope re·anggipa February 17 tariko, South Garo Hills Siju ni St. John’s Parish o dangdike on·enggipa Sr. Rosemary ko kragija dakani bidingo assemblyo janapangaha. Toromko nitee aro basee manderangni kragija dakanirangko mikkangchi chagrongna nangjanagita a·dok sorkariko Assam a·dokni CM baksa golpogrike namgipa ja·kurangko de·china Pyngrope didiangaha.
Sr. Rosemary-ko ua salo Dudhnoi oni Goalparaona re·angmiting somoio chu·gimik parako gamanahaoba, bus conductor aro songrerimenggipa manderang uni ganding chindingko aro uni bebe ra·e gangipa bosturangko nie kragija kattarangchi agane uko darangba donggijapa biapni ramao bus-oni ong·ondraate donangaha ine u·inagita man·angaha. Bus-oni gale donangako man·ani ja·mano ua dingtang bus-osa Goalparaona re·angna nangaha ine Pyngrope aganangaha.
Ia ong·a obostako bakan Tura ni Auxiliary Bishop, Jose Chirackal dingtangmancha Chief Minister Conrad Sangma aro Rongarani MLA Rakkam Sangma baksa golpogrikangaha. Pyngrope ni kattarangna aganchakengon Chief Minister ia ong·anggimin a·selni bidingo Assam ni Chief Minister baksa golpogrikna aro niatna ku·chakangaha. Indake ong·genchimoba busni number aro gipin u·ina nanggiparangko chu·ongagita man·kujaengani gimin iani bidingo ja·ku de·nagita sengna nangkuenga ine Conrad Sangma agandapangaha.
