BSF aro Meghalaya pulis dolrang bakrime South Garo Hills sima ari joloniko am·sandianirangko dake gong lakh 20 mangna batpilgipa damni chini aro ran·gimin gue biterangko Rongara songni sepango donggipa galchipgipa nokoniko man·aha ine koborna u·iataha.
Pulis dolrangni chanchichipanigitade, rim·a man·gimin chini aro gue granrangko Bangladesh a·songona badingsrukatna miksonge donnue dongimin ong·a ine janapataha. Iani bidingo nanggipa ja·kurangko de·nagita man·gimin bosturangko Rongara Police Station ni jako pakwatangaha ine u·iataha. Ia am·sandianiko dake chu·sokaniara a·songni sima arirango naljoke rakkiani ong·an baksa a·songni namgnina aro kajina man·aniko tang·doatani ong·a ine parakataha.
