Bangladesh a∙songoni niamgri mande napdrabaaniko, badinganiko, mande so∙otaniko aro dingtang dingtang a∙selrangoniko naljokatnagita Police department ge 19 Anti Infiltration Unit aro 13 pulis station rangko Mahendraganj, Ampati, Dalu, Baghmara, Rongara, Dawki, Pynursla, Shella, Mawsynram, Ranikor, Lumshnong, Gasuapara aro Nonglam ni sima ari jolrango rikna tik ka∙angaha ine Home Minister aro Deputy Chief Minister Prestone Tynsong parakangaha.
Indakgipa obosta ong∙anirangko champengsonagita gimik a∙jani Deputy Commissioner aro SDO (Civil) rang apsan bakrime kamrangko ka∙na sorkari re∙anggipa February 16 tariko ge∙etaniko dakangaha ine Tynsong u∙iatangaha. Iako chu∙sokatna Co-ordination Committee ko songangaha jeon Chairman ni biapko SDO jako ra∙e dilaniko dakanggen. Committee ni kamrangko ka∙nagita BSF, SP, SDPO, Nokma aro Sordar rangko member na seokanggen aro uamang bakrime koborrangko on∙grike kamrangko ka∙anggen. A∙sel ong∙anirangko champengsonagita sima ari jolrango Village Defense Party rangkoba songe nirok sandianikoba dakanggen ine Tynsong aganangaha.
