Tura Government College, Entrepreneurship Development Centre-nigita salbongana ong·atanggipa Faculty Development Program (FDP) nambee aro chu·sokgipa ong·e matchotangaha. Ia programko re·anggipa February 19 oni 23 tarikona ong·atangaha jekon Indian Institute of Entrepreneurship (IIE), Guwahati mongsonggipa kam ka·dilgipa ong·e aro North Eastern Council (NEC), Shillong ni dakchakanichi Tura Government College ni Entrepreneurship Development Centre ong·atangaha.
Ia programo college aro training institute rango skigiparangna entrepreneurship ni bidingo maikai chatro chatrirangni gisikona nanggipa changa sapanirangko ra·bae on·a aro uamangni skia poraianio gitalgipa chanchianirangko bikotna dakchaknagita skie on·angaha.
Skanggipa salo programko Government Collegeni Principal, Isaac W. Momin-ni dongpaanichi a·bachengataha jeon ua da·oni chasongo an·tangtangni changa sapaniko jakkale dake cha·ani cholrangni gamchataniko aganangaha.
Salbongani programo bakko ra·giparang workshop aro nanggipa u·ianirangko saksa sakgipinoniko agan golpogrike ma·sie ra·angaha. Ia salrangni gisepo uamang entrepreneurship ni gimin miksonganiko ma·sina, bading chiwalani cholrangko u·ina aro dilna, unbaksana gipin gamchatbegipa skie ra·anirangko man·angaha. Iasan ong·aigija bakko ra·giparang tok dake suale projectrangko apsan ka·angaha, lesson plan rangko tarina skie ra·angaha aro an·tangtangni a·bao entrepreneur ni bidingo bi·sarangna skina u·ie ra·angaha.
Ia programko ong·ataniona sak 13 dingtang dingtang departmentni Professor rang aro Entrepreneur rang mongsonggipa skigipa ong·e re·bae, uamangni ma·siani aro u·ianirangko bak ra·gipa sakantinan skie on·angaha. Ia programo Tura Govt. College ni skigiparangsan ong·aigija dingtang dingtang college jekai Don Bosco College, Durama College, PASF-Abong Noga College aro ITI ni skigiparang chu·gimiko sak 15 re·bae bakko ra·angaha.
