AHAM Central Executive Body (CEB) H.Q Tura ni President George Prince Ch. Momin, dolni palo adita nangnikanirangko janapate Chief Minister Conrad Sangma-na chittiko sedoataha.
Da·o ong·enggipa Meghalaya budget session-o Mawkyrwat ni MLA, Renikton Tongkhar a·dokni jat gittamna 80% ka·e job reservationko tikatna nanga ine agangipa kattangrangko jegalate jatprakna tikate dongimin niamrangko ja·rikchina mol·molataha. Reservation policy ko maming pangchakani gri dingtangatgenchimode bang∙a jatrangni gisepo jingjengatanirang, so·sojengjeng ong·anirang aro a·doko bang·a gipin neng·nikanirangko chagrongnaba gnang ine AHAM dolrang parakangaha. Ia policy-ko Khasi aro Garo jatna apsan tang·doanina tarie donangaha jekon niamko tarigiparang reservation policy ni bidingo pagitchamrangni miksonge tik ka·giminko u·ichengna nanga ine AHAM dolrang aganangaha.
Unbaksana Dudhnoi oni Dalu ona tariangenggipa NH62 ramako da·onaba matchotkujaengani a·selo songdongenggipa, re·ruraenggipa aro bading chiwalanio neng·nikaniko man·enga ine AHAM dolrang u·iatangaha. Ia ramako matchote tarikujaenganichi mongsongbate wachi karini somoirango salantio re·ruraenggiparangnasan neng·nikaniko on·aigija nangchotmotgipa bosturangko salruragipa jolni bading chiwalgiparangna neng·nikaniko on·enga ine AHAM dolrang parakangaha.
Uarangsan ong·aigija ia ramako re·giparangna mongsongbate walni somoio naljokani grigipa ong·enga, saa ding·aniko sanna, lekka porako ra·na aro antirangko cha·na champenganiko on·enga ine uamang parakangaha. Unbaksana nalarangko name tarijani a·selo a·arang ruronge aro bolrangko den·anichi samtangtango donggipa janggi gnanggiparangko nosto ong·ataona sokatenga ine AHAM dolrang janapataha. Ia a·selrangko chagronganiko champengna NH62 ko namgipa bimango ta·rakale tarie on·china jako ra·enggiparangko AHAM dolrang mol·molataha.
Una agreba New Tura oni Medical college-ona dakanggipa ramako tarina chamataoni indita bilsi ong·pilaonaba matchotatgija donengani gimin AHAM dolrang chittio janapataha. Koborrangko man·anigitade ia ramako tarina No Objection Certificate (NOC) rangko man·a nangkuengani gimin tarikujaenga ine u·ina man·angaha. Ia ka·na nanggnigipa kamrangko indita bilsi ong·piloba matchotna ru·utenganiara songdongenggiparangna aro namgniko man·agiparangna champengataniko ra·baenga ine AHAM dolrang parakangaha. Rongkhon chibimako kasotgipa dolongko matchotmanahaoba re·chakatgipa ramakode da·onaba tarikujaenga aro namen ja·manchakenga jekon kamko jako ra·gipani bil amsokgijaniko mesoka aro chu·gimik name nirokatna nangenga ine AHAM dolrang parakataha.
