North Garo Hills Resubelpara, Community Health Centre (CHC) o Pradhan Mantri National Dialysis Program ni dakchakanichi a·dok sorkari aro HANS Foundation ni bakrime kam ka·anichi Dialysis Unitko a·bachengate on·angna man·aha. Health Minister Ampareen Lyngdoh a·dok sorkari aro HANS Foundation ni rake kam ka·e ia cholko ra·bae chu·sokatna man·anina de·mittelaniko on·angaha.
Ia dakgipa centre rangko Shillong, Jowai aro Tura Civil Hospital o a·bachenge kamrangko ka·engaha aro Mairang, Williamnagar, Baghmara songjinmarangoba apsan centre rangko ru·utgijaan rikna a·bachengatanggen ine Lyngdoh u·iataniko dakangaha. HANS Foundation a·dokni kona noksik ge·antiona sanna bannaniko nambata gadango sokatna dam 30 ong·nasipile Sub-Centre rangko songna jako ra·e kamko ka·angaha.
