South Garo Hills ni Nokrek Area Development Committee (NADC) dolrang Chopot Block ni ning∙o donggipa songrango ramarang namjani bidingo nirokatchina Tura ni MP Agatha K Sangma ko gronge chittiko on∙angaha. Ia rama rangara Durabanda oni Awegre, Anchigre, Pasimgre, Rongchangre, Dana Adugre aro Mekalpagre gita napake Chokpot ona najokgipa rama ong∙a jekon chengo “Raja Rama” ine aganrongbaa ine u∙iatangaha. Ia rama namjani a∙sel jolo songdongenggipa manderangna nanggitikani somoio ba sa ding·ani somoirango neng∙nikaniko on∙enga maina wachi kario ia ramagita gari gorarangko salna saltogijagipa ong∙a.
Ia jolo songdongenggipa manderang bang∙batan sorkarini kamko ka∙e cha∙giparang ong∙pajae ge∙e game cha∙giparang ong∙a aro uamangni man∙gimin bosturangko pala sim∙anio rama jal∙angrang namjani a∙sel komibea damrango palatna nangaona ga∙akenga ine NADC dolrang janapangaha. Unbaksana gari gorarang re∙na dona man∙jae wachi karini somoio skulo poraienggipa chatro chatrirang chel·gipa ramarangko ja∙achi re∙na nangao ga∙akenga ine uamang u∙iatangaha.
Ia ramani bakroa 25 Km san ong∙a aro ramarang namen namjani a∙selo re∙a doanio aro salanti janggitanganio neng∙nikanirangko man∙enganikoba janapangaha. Jolni manderang an∙tangtangni salantio nanggipa bosturangko ra∙na Tura bajar ona re∙baronga aro Turaona re∙baengon gari gorarang re∙na dona man∙jae uamang kilometer 33 rangko ja∙achi re∙bana nangronga ine janapangaha. Ia ong∙genggipa obostarangko aro jolni manderangni neng∙nikanirangko olgrokatna niroke kamrangko ka∙atpachina gita NADC dolrang MP Agatha K. Sangma ko mol∙molangaha.