Captain Williamson Sangma State University ko 2025 bilsioni a·bachengatna miksongenga ine Education Minister Rakkam Sangma kobor ra·timgiparangna parakangaha. Ia University-ko 2024 bilsioni a·bachengatna chanchisamsoani donggenchimoba Vice Chancellor, skigiparang aro gipin kam ka·giparangko seokna choljokjae re·mikkangna man·jaha ine Sangma parakangaha.
Unbaksana kamna rim∙napaniko dakna parakatanio, interview-ko ra·anio, kamna seokaniko dakanio somoi ra·an baksa ki·taprangni syllabus-ko tarina, skiani a·barangko a·bachengatna aro board-ni memberrangko seokanio somoirang apchangketani a·sel 2025 bilsiosa a·bachengatna miksongenga ine Sangma u·iatangaha.
University Entrance Test (CUET) gimin aganengon, CUET exam ko central university na dorgasto galgiparangsa sena man·a, State University na dorgasto galgiparang CUET ko segija State University-ni dongimin niamrangko ja·rikna man·skagen ine Rakkam Sangma aganangaha.
