South Garo Hills a·jani ning·ao rama jal·angrang aro bang·a gipin kamrangko sorkari nirok simsakgija donenganiko nike ia neng·nikanirangko namdapatna Southern Zone Niksamso Garo Community Organisation (NGCO) aro NGCO, HQ CEB, President baksa tom·e chanchirimangaha ine koborna parakataha. NGCO dolrangni am·sandianio rama jal·angrangsan ong·aigija dingtang dingtang department-ni schemerangkoba SGH ni bang·bata biaprango kamrangko chu·sokatgija donenga ine uamang parakataha.
Ia tom·anio uamang mikkangchi Garo Hills o tourism-chi tang·doaniko ra·bana jekai dongchakani nokrangko rikna aro nitogipa biaprangko tange rakkiani bidingo sorkariko didinagita ja·ku de·na chanchirimangaha. Ian A·chik jatko tang·doatna aro a·dokna rasongko ra·baan baksa nitogipa a·bri chiringrangchi mingsing minggamaniko man·a cholko on·e dakchakani ong·gen ine NGCO dolrang parakataha.
Unbaksana Garo Hillsni manderangna ge·a gamani gitalgipa cholrangni bidingo ma·siate dakchakaniko on·a aro bading chiwalaniko tang·doatna awareness programrangko mikkangchi ong·atna tom·anio ku·cholsan re·mikkangna chanchirimangaha ine parakataha.
