Bangladesh a·songoniko Assam a·dokona ran·gimin gue aro chinirangko Meghalaya a·dokgita niam gri salenganina nirokate nanga ja·kuko de·china Rongjeng Regional Unit ni GSU aro AOSW dolnigita EGH ni Deputy Commissioner na chitti see u·iatangaha. Ia bosturangko Dawki-Shillong, Nongstoin-Rongjeng-Dainadubi aro Baghmara-Nongalbibra-Songsak-Mendipathar ramaranggita niam gri aro lekka pancharang donggija salenga ineba uamang janapangaha.
Indake gipin a·songoniko niam gri guerangko salanichi Garo Hills o gueni damrang komienga aro gipinchiko dam komie man·engani a·selo Garo Hills ni guerangko nama damo palnagita man·jae game ge·e cha·giparangna mongsongbate gue ge·e janggitanggiparangna neng·nikaniko ra·baenga ine chittio janapataha.
Unbaksana Assam a·dokoniko Bangladesh-ona, sal wal gari bol 20 ba 30 dake Dainadubi-Rongjeng-Nongal-Baghmara aro Mendipathar-Songsak-Darugre-Nongal-Baghmara ramaranggita salenganikoba janapataha. Kosako janapgimin ramarango inditan check post rang bang·genchimoba maikai niamgri salna nengrae salangna man·enga ineba u·iatangaha. Indake niamgri salani a·selo chinirangni dam tang·doenga aro ia kamrangko dontongatjaode changsaode chinina neng·nikaniko chagronggen ineba janapangaha.
Una agreba gue gran, chinirangkosan niamgri salaigija ramarango smu, chini aro gue salgiparangoniko skatang A·king Nokma rangni bimungo kajina gile ra·enganikoba u·iatangaha jean game cha·giparangni man·aoniko pale sim·e cha·enggiparangni bosturangni damko komiataona sokatenga ineba janapangaha. Indake uamangni janapgimin obostarangko nirokate aro nanggipa ja·kurangko de·e, dongimin niamrango pangchake kraa sastiko on·china DC ko mol·molangaha.
