Da·al pringni bako Hynniewtrep National Liberation Council (HNLC) bobil dakgipa dolni Personal Security Officer (PSO) saksako Shillong songjinmaoniko pulis dolrang rim·aha ine koborna parakataha.
Pulis dolrang ia bobil dakgipa mandeni donge chakenggipa biapko ma·sinagita man·e uko Khliehshnong Block C ni Mawlynrei oniko rim·nagita man·aha ine u·iataha. Rim·a man·gipa mande bilsi 41 ong·gipa Storgy Lyngdoh ong·a. Lyngdohni jakoniko pulis dolrang mobile phone ge·sa baksa Bangladesh ni sim card, India ni Airtel sim card aro 1GB SD memory cardko man·aha.
Pulis dolrangni uko singsan·dianiko dakon tangka dabianio, HNLC ko nangrimataina kam ka·aniko, an·tangrangni dolna chakchinagita didianiko aro a·songni kosak chakate golmal gondokolko ra·banagita miksonganirangko ma·sinagita man·angaha.
