Sukrobar walni somoio Shella songni saksa Arsen Marak ko BSF dolni goe so·otaha ine kobor ra·timgiparangniko u·ina man·soaha. Ia ong·a obostani bidingo da·o dipet maming FIR ka·aniko man·sokujani gimin am·sandianiko dakangkuenga aro sianggipani manggisiko post mortem ka·na ra·angaha ine East Khasi Hill ni Superintendent of Police Rituraj Ravi parakataha.
BSF dolrangni agananigitade uamangko chagrope ka·mikkenatani a·sel an·tangtangko naljokatnasa slai goaona sokaha ine SP aganangaha. Re·anggipa somoirango dingtang dingtang songni manderang aro BSF dol ni gisepo aditan nanggrikanirang donganiko nikangnagita man·aha jekon Assembly oba ia ong·genggipa obostani gimin chanchirimaniko dakangaha.
